वीरगंज – वीरगंजको औद्योगिक घाराना केडिया परिवारको एमबी (महाबीर प्रसाद) केडिया सेवा ट्रस्टले बारा र पर्साका हावाहुरी पीडितलाई ११ लाख सहयोग गरेको छ।
ट्रस्टले शुक्रबार मुख्यमन्त्री राहत कोषमा जम्मा हुने गरि प्रदेश नं २ का मुख्यमन्त्री लालबाबू राउतलाई ११ लाख रुपैयाँ हस्तान्तरण गरेको हो।
केडिया आँखा अस्पताल परवानीपुरमा आयोजित चेक हस्तान्तरण कार्यक्रममा ट्रस्टका अध्यक्ष हीरालाल केडियाले मुख्यमन्त्रीलाई चेक हस्तान्तरण गरेका थिए।
उनले समाजिक क्षेत्रमा लामो समयदेखि ट्रस्ट काम गर्दै आएको र हालै बारा पर्सा जिल्लामा आएको हावाहुरीको कारण पीडित परिवारलाई राहत पुगोस् भनेर सहयोग गरेको बताए।
सहयोग रकम बुझ्दै मुख्यमन्त्री राउतले पीडितलाई सहयोग गरेकोमा केडिया ट्रस्टलाई धन्यवाद व्यक्त गरे। उनले वर्षायाम भन्दा अगावै प्रदेश सरकारले नेपाली सेनाको सहयोगमा पीडितहरुको घर बनाइ सक्ने दावी समेत गरे।
