धनगढी - जनअपेक्षा अनुसार काम हुन नसकेको भन्दै सुदूरपश्चिम प्रदेशसभामा सत्तापक्षकै सांसदहरुले सरकारको आलोचना गरेका छन्। प्राकृतिक विपदमा परेर सुदूरपश्चिका विभिन्न क्षेत्रमा भएको क्षतिमा प्रदेश सरकारले राहत दिन नसकेको भन्दै प्रदेश सभामा सांसदहरुले सरकारको आलोचना गरेका हुन्।
असिना, पानी, हावाहुरी र बाढी पहिरोबाट भएको क्षतिमा एक वर्षसम्म पनि सरकारले राहत नदिएको भन्दै प्रदेशसभा सदस्यहरुले आलोचना गरेका छन्। मंगलबारको बैठकमा बोल्ने सत्तारुढ दलका सांसदहरुले राहत दिन तदारुकता देखाउन सरकारलाई आग्रह गरे। नेपाल कम्युनिष्ठ पार्टी (नेकपा)का सांसद तथा सचेतक अक्कल रावलले प्राकृतिक प्रकोपबाट ज्यान गुमाएका तथा क्षति व्यहोरेकाहरुलाई सरकारले तत्काल राहत दिनुपर्ने माग गरे।
प्राकृतिक प्रकोपबाट क्षति भएकाहरुले गत वर्षदेखि राहत नपाएको भन्दै सत्तारुढ दलका सांसदहरुले सरकारको आलोचना गरेका हुन्। नेकपाका सांसद पूर्णा जोशीले प्रदेश भित्रैका पीडितहरुले राहत नपाएको अवस्थामा अन्य प्रदेशमा राहत उपलब्ध गराएको विषयमा प्रश्न गरेकी छन्।
प्रदेशसभा बैठकको विशेष समयमा बोल्ने प्रदेशसभा सदस्यहरुले बजेट खर्च सन्तोषजनक नभएको भन्दै सरकारको काममा असन्तुष्टि व्यक्त गरेका थिए। सत्तारुढ दलकै सांसद चुनकुमारी चौधरीले चालू आर्थिक वर्षको बजेट खर्च नहुने संकेत देखा परेको भन्दै सरकारको ध्यानाकर्षण गराइन्।
प्रमुख प्रतिपक्षी दलले पनि बजेट खर्च गर्न सरकार असफल भएको आरोप लगाएको छ। कांग्रेस सांसद भरतबहादुर खड्काल ठूलो बजेट ल्याउनुभन्दा बजेट खर्च गर्नसक्नु महत्वपूर्ण हुने बताए। प्रदेश सरकारले समयमा बजेट खर्च गर्न नसके विकास निर्माणका कामसमेत प्रभावित हुने उनले बताए।
