मिर्चेया - जिल्लाको मिर्चेयामा जनमत पार्टीले शनिबार आयोजना गरेको आमसभालाई सम्बोधन गर्दै डा. सिके राउतले मधेसी दलहरुका दोकान बन्द हुने बताएका छन्।
सम्बोधनका क्रममा राउतले मधेस केन्द्रीत दलहरुलाई सामन्तवादी, जमिन्दार र ठेकेदारको संज्ञा दिएका थिए। कुनै दलको नाम नलिए पनि उनले मधेशी जनताको नाममा खोलिएका ‘दोकान’ चाँडै बन्द हुने दाबि गरे।
उनले अगाडि भने,‘उनीहरुले मधेसीको अधिकार चाहँदैनन्, किनभने मधेसीले अधिकार पाउँदा उनीहरुको सामन्ती प्रथा रहन सक्दैन।’
राउतले मधेसमा फोहोरी राजनीति भइरहेको र त्यही फोहोर हटाउन आफू राजनीतिमा आएको स्पष्ट पारे । उनले भने, ‘मधेशमा एउटा पार्टीको आवश्यक्ता थियो, मेरो राजनीति बिरासत छैन। तर, राजनीतिको फोहोर हटाउनकै लागि राजनीति गर्छु।’
त्यस्तै सरकारसँग भएको ११ बुँदे सम्झौता मधेशी जनताको ऐतिहासिक विजयी भएको बताएका छन्। आफू नझुकेको बरु, सरकार आफूसँग सहमति गर्न आएको उनको दाबी छ। राउतले भने, ‘हिजो धरपकड गर्ने, दमन गर्ने सरकारले अहिले सुरक्षा पो दिइरहेको छ।’
आफूहरुले मागेभन्दा दश गुण बढी जनमत सरकारले दिएको उनको दाबी छ। उनले अगाडी भने, ‘हामीले नारा दिँदा ‘अबकी बार एक ही माग जनमत संग्रहका हो ऐलान’ भन्ने गरेका थियौं, तर सरकारले जनअभिमत दिएको छ। यो जनमत संग्रहभन्दा ठूलो कुरा हो।’
