धनगढी – नेपाली कांग्रेसका सभापति तथा पुर्वप्रधानमन्त्री शेरबहादुर देउवाले ओली नेतृत्वको सरकारले हरेक ठाउँमा हस्तक्षेप गरेका कारण जनताले अनाहकमा दुख पाएको बताएका छन्।
नेपाली कांग्रेस जिल्ला कार्य समिति कैलालीले आयोजना गरेको नयाँ वर्षको वार्षिक क्यालेण्डर विमोचन तथा शुभकामना आदान–प्रदान कार्यक्रममा बोल्दै देउवाले ओली सरकारको हस्तक्षेपविरुद्ध सडक आन्दोलनमा जानुपर्ने अवस्था आएको बताए। दुई तिहाइ शक्तिको दम्भमा सरकारले नागरिकलाई दुख दिएको कांग्रेसले सहन नसक्ने उनको भनाइ थियो।
नागरिकको मौलिक अधिकारसँग जोडिएको नागरिकतासम्बन्धी विधेयक कुनै पनि हालतमा संशोधन गर्न नहुने देउवाले बताए। पार्टीभित्र सभापतिका विरुद्धमा अचाक्ली विरोध गर्नेलाई कारवाही गरिने देउवाले बताए। पार्टीविरुद्ध बोल्ने जोकोहीलाई पनि कारवाही हुने देउवाले दाबी गरे। पार्टी भित्रको अन्तद्वन्द्व कम नभएसम्म सफलता नमिल्ने देउवाले बताए। अबको ४ वर्ष भाषण गर्नुसट्टा जनताको घरघरमा जान देउवाले कार्यकर्तालाई आग्रह गरे।
नेपाली कांग्रेसका केन्द्रीय सदस्य रमेश लेखकले सदस्यता वितरणलगायत बिभिन्न कुरालाई अभियानका रुपमा क्यालेण्डरमार्फत काग्रेसले गरेका कामहरु जनताको घरदैलोमा पु¥याउनुपर्ने बताए। कम्युनिष्ट सरकारलाइ इतिहासको बारेमा थाहा नभएकाले नेपाली जनतालाई स्वतन्त्रता प्रदान गर्ने सवाल र देशको लोकतान्त्रिक अभ्यासलाई बलियो बनाउने सवालमा नेपाली कांगे्रस मात्र सफल भएको उनले बताए।
