वीरगञ्ज – संघीय समाजवादी फोरम नेपाल प्रदेश २ को प्रथम अधिवेशनमा नयाँ नेतृत्व चयनका लागि मतदान हुने भएको छ। शुक्रबारदेखि सिरहामा जारी प्रथम अधिवेशनमा सहमति हुन नसकेपछि निर्वाचन हुने निश्चित भएको हो।
५१ सदस्यीय प्रदेशस्तरीय समितिको अध्यक्षमा पूर्व अध्यक्ष रेणु यादव र प्रदेश २ का अर्थमन्त्री विजय यादवबीच सहमति हुन नसकेपछि निर्वाचन हुने पक्का भएको संघीय समाजवादी फोरम नेपाल पर्साका कार्यवाहक अध्यक्ष सुन्दरप्रसाद कुर्मीले बताए। उनका अनुसार अधिवेशनमा सहमतिको प्रयास पनि भइरहेको छ। ‘निर्वाचन मण्डल र अध्यक्ष मण्डल चयन गरी निर्वाचन प्रक्रिया अगाडि बढिसकेको छ,’ उनले भने, ‘तैपनि राष्ट्रिय अध्यक्ष उपेन्द्र यादव ज्यूले रेणुजी र विजयजी बीच वार्ता गरिरहनु भएकाे छ। सकेसम्म सहमतिमै प्रदेश समति चयन गर्ने लक्ष्य हो।’
अधिवेशनले मुख्यमन्त्री लालबाबू राउतको संयोजकत्वमा ५ सदस्य अध्यक्ष मण्डल तथा जितेन्द्र यादवको संयोजकत्वमा ३ सदस्यीय निर्वाचन मण्डल चयन गरिसकेको छ। शुक्रबार बिहान १२ बजे गोपाल सेवा समितिमा राष्ट्रिय अध्यक्ष उपेन्द्र यादवले उद्घाटन गरेको अधिवेशन राति १ बजेसम्म चलेको थियो।
उद्घाटन सत्रपछि प्रदेश २ की समिति अध्यक्ष रेणु यादवले राजनीतिक प्रतिवेदन र प्रदेश सचिव शेषनारायण यादवले आर्थिक प्रतिवेदन प्रस्तुत गरेका थिए। शनिबार दिउँसो १ बजे देखि शुरु भएको छलफलमा सहमति नभएपछि निर्वाचनमार्फत समिति चयन गर्नेतर्फ पार्टी लागेको हो। अध्यक्षका दाबेदार पुर्व अध्यक्ष रेणु यादव पार्टीकी केन्द्रीय उपाध्यक्ष हुन् भने विजय यादव पार्टीका केन्द्रीय कोषाध्यक्ष हुन्।
