काठमाडौँ - अनेरास्ववियुका कार्यवाहक अध्यक्ष रश्मि आचार्यले त्रिविमा भागवण्डाको राजनीति अन्त्य हुनुपर्नेमा जोड दिएका छन्।
त्रिवि सेवा आयोगले लिएको खुला प्रतिस्पर्धामा त्रिविकै उच्च पदाधिकारी, विद्यार्थी संघ-संगठन र नेताका नातेदारहरूको नाम निस्किएपछि चौतर्फि विरोध शुरु भएको छ।
यस विषयका सन्दर्भमा अनेरास्ववियुका कार्यवाहक अध्यक्ष आचार्यले भने, ‘त्रिवि र सिङ्गो शिक्षा क्षेत्रमा देखिएका विकृति अन्त्यका लागि हामी निरन्तर खबरदारी गर्दै आएका छौँ, जुन समाचार आएको छ, यसमा हाम्रो गम्भीर ध्यानाकर्षण भएको छ, यसरी सडकमै पोखिने गरी त्रिविको अवस्था आउनु दुःखद छ, यसका बारेमा छानबिन हुनुपर्छ।’
उनले भने, ‘त्रिविमा मात्रै होइन, शिक्षा क्षेत्रमा योग्यताका आधारमा कर्मचारी नियुक्ति गर्नुपर्छ। राजनीतिक भागबण्डा, मिलेमतो लगायतका विकृतिहरूको अन्त्य हुनुपर्छ, हामीले निरन्तर यही भन्दै आएका छौँ तर यहाँ पुरानै शैलीमा कर्मचारी भर्ती गर्ने र त्रिविलाई कुरूप बनाउने काम भइरहेको छ।’
‘हाम्रो विश्वविद्यालयमा धेरै विकृति छन्, दुई तिहाइको सरकारको पालामा पनि यसलाई सुधार्न र सफा गर्न सकिएन भने आइन्दा झन् असम्भव देखिन्छ, त्यसैले राजनीतिक भागबण्डा र आफन्तलाई भर्ती गर्ने परिपाटीको अन्त्य हुनुपर्छ।’
कार्यवाहक अध्यक्ष अचार्यले भने, ‘मैले यति भन्दै गर्दा कर्मचारीका नातेदार र राजनीतिक दलका आफन्तले नाम निकाल्नै नसक्ने भन्न खाेजेको होइन, उहाँहरूमा पनि योग्यता होला तर परीक्षा लिने आफन्त, प्रश्नपत्र निर्माण गर्ने आफन्त, उत्तरपुस्तिका जाँच्ने पनि आफन्त र जागिरका लागि लभिङ गर्ने पनि आफन्त भएको खण्डमा भने प्रश्न उठ्छ। यस्ता विकृतिको अन्त्य गर्न नीतिगत सुधार आवश्यक हुन्छ। अब त्रिविको अवस्था सुधार्न नीतिगत रूपमा पहल थाल्नुपर्छ।’
विद्यार्थी संगठनका नेताहरू नै बिचौलिया बन्नुहुन्छ, कसरी त्रिविको विकृति हट्छ त? भनेर सोधिएको प्रश्नको जवाफमा नेता आचार्यले भने, ‘संगठनले कुनै पनि व्यक्तिलाई जागिर दिन लगाउँदैन तर कोही व्यक्तिले मेरो मान्छे भन्छ भने त्यो फरक कुरा हो, यहाँभन्दा पहिलेकै तरिकाले न त त्रिविले चल्न पाउँछ न त विद्यार्थी संगठन र नेताहरूले। उपयुक्त ठाउँमा योग्य मानिस भएन भने समृद्धिको अभियान सफल हुँदैन, यसमा हामी सचेत हुन जरुरी छ।’
त्रिविमा स्वच्छ प्रतिस्पर्धा नहुनुका कारण नीतिमै समस्या हो त? भनेर सोधिएको अर्को प्रश्नको जवाफमा आचार्यले भने, ‘हाम्रो विश्वविद्यालयमा धेरै विकृति छन्, दुई तिहाइको सरकारको पालामा पनि यसलाई सुधार्न र सफा गर्न सकिएन भने आइन्दा झन् असम्भव देखिन्छ, त्यसैले राजनीतिक भागबण्डा र आफन्तलाई भर्ती गर्ने परिपाटीको अन्त्य हुनुपर्छ।’
स्रोतका अनुसार त्रिवि सेवा आयोगका अध्यक्ष चैतन्य शर्मा, प्रमुख परशुराम कोइराला, त्रिवि केन्द्रीय क्याम्पसका प्रिन्सिपल कृष्ण आचार्य, पूर्वरजिस्ट्रार चन्द्रमणि पौडेल, अनुगमन महाशाखाका प्रमुख विष्णुप्रसाद खनाललगायत उच्च पदाधिकारीका नातेदारहरू परीक्षामा सफल भएका छन्।
त्रिवि आयोगको लिखित परीक्षामा उत्तीर्ण हुने धेरैजसो पहुँचवालाका आफन्त परेपछि अख्तियार दुरुपयोग अनुसन्धान आयोग र राष्ट्रिय सतर्कता केन्द्रमा यसबारे उजुरी परेको छ। त्रिविका कर्मचारी संघ–संगठन र परीक्षामा सहभागी केही विद्यार्थीले आयोग, केन्द्र, कुलपति, उपकुलपति कार्यालयलगायत त्रिविकै विभिन्न निकायमा समेत उजुरी दिएका छन्।
स्रोतका अनुसार त्रिवि सेवा आयोगका अध्यक्ष चैतन्य शर्मा, प्रमुख परशुराम कोइराला, त्रिवि केन्द्रीय क्याम्पसका प्रिन्सिपल कृष्ण आचार्य, पूर्वरजिस्ट्रार चन्द्रमणि पौडेल, अनुगमन महाशाखाका प्रमुख विष्णुप्रसाद खनाललगायत उच्च पदाधिकारीका नातेदारहरू परीक्षामा सफल भएका छन्।
