काठमाडौं– वर्षाले प्रभावित मगंलवारको खेलमा श्रीलंकाले अफगानिस्तानलाई ३४ रनले पराजित गरेको छ। डकवर्थ लुइस नियमको आधारमा ४१ ओभरमा छोट्याइएको खेलमा अफगानिस्तानले श्रीलंकाले दिएको २ सय २ रनको लक्ष्य पुरा गर्न सकेन्।
औसत लक्ष्य पछ्याउन मैदानमा उत्रिएको अफगानिस्तान ३२ ओभर ४ बल खेल्दै १ सय ५२ रनमा अल आउट भयो।
अफगानिस्तानलाई सस्तोमा समेट्ने क्रममा श्रीलंकाका नुवान प्रदिपले ३.४४ रन प्रतिओभरको औसतमा ९ ओभर बलिङ गर्दै ४ विकेट हात पारे। यसैगरी भेट्रान पेस बलर लासिथ मलिंगाले ६ ओभर ४ बलमा ५.८५ रन प्रतिओभरको औसतमा रन खर्चर्दै ३ विकेट हात पारे।
यसैगरी इसुरु उडाना र थिसारा परेराले समान १–१ विकेट लिए। सुरुगां लकमल र धनन्जय डि सिल्भा विकेटविहिन रहे।
बलिगंमा राम्रो प्रदर्शन गरेको अफगानिस्तानले व्याटिगंतर्फ निकै कमजोर प्रदर्शन गर्दा हार टार्न सकेन्। लक्ष्य पछ्याउने क्रममा अफगानिस्तानका नाजिबुल्लाह जदरानले सर्वाधिक ४३ रन बनाए। यस क्रममा उनले ५६ बलको सामना गर्दै ६ चौका प्रहार गरे।
यसैगरी ओपनर हजरतुल्लाह जजाईले २५ बलमा ३ चौका र १ छक्काको मदतमा ३०, गुलाबदिन नैबले ३२ बलमा २ चौकासहित २३ र महमद नाबिले १६ बलमा १ चौकासहित ११ रन बनाए। अन्य अफगानी व्याट्सम्यानहरुले दोहोरो अंकमा रन बटुल्न सकेनन्।
यसअघि पहिले व्याटिङ गरेको श्रीलंकाले औसत प्रदर्शन गर्दै २ सय १ रन मात्र बनाउन सक्यो। वर्षाका कारण ४१ ओभरमा छोट्याइएको खेलमा श्रीलंका ३६ ओभर ५ बल मात्र टिक्न सक्यो।
पहिलो विकेटको लागि ९२ रनको उत्कृष्ट साझेदारी गरेको श्रीलंकाका मध्यक्रम र पछिल्लो क्रममा व्याट्सम्यानहरु नचल्दा श्रीलंका कम योगफलमा रोकिन बाध्य भयो।
यसक्रममा श्रीलंकाका कप्तान तथा ओपनर व्याट्सम्यान दिमुथा करुणारत्नेले ४५ बल खेल्दै ३ चौकाको मदतमा ३० रन बनाए। अर्का ओपनर कुशल परेराले सर्वाधिक ७८ रन बनाउने क्रममा ८१ बलमा ८ चौका प्रहार गरे।
यसैगरी लाहिरु थिरिमानेले १ चौकाको मदतमा ३४ बल खेल्दै २५ रन, सुरुङ्गा लकमलले २ चौकाको मदतमा १५ रन र इसुरु उडानाले २१ बल खेलेर १ छक्काको मदतमा १० रन बनाए।
श्रीलंकाका अन्य व्याट्सम्यानहरुले दोहोरो अंकमा रन जोड्न सकेनन् भने ३ जना व्याट्सम्यान शुन्यमा आउट भए।
श्रीलंकालाई सस्तोमा समेट्ने क्रममा अफगानिस्तानका बलर महमद नाबीले उत्कृष्ट प्रदर्शन गरे। ९ ओभर बलिङ गरेका उनले ३.३३ रन प्रतिओभरको औसतमा रन खर्चदै श्रीलंकाका ४ वटा महत्वपुर्ण विकेट हात पारे।
यस्तै रसिद खानले पनि ७ ओभर ५ बल फ्याक्दै २.१७ रन प्रतिओभरको दरमा रन दिएर २ विकेट हात पारे। भने दवलत जदरानले पनि समान २ विकेट लिने क्रममा ५.५६ रन प्रतिओभरको औसतमा रन खर्चदै ६ ओभर बलिङ गरे।
योसँगै श्रीलंकाले यसपटकको बिश्वकपमा जितको खाता खोलेको भने अफगानिस्तानको यो लगातार दोश्रो हार हो। यसअघि आफ्नो पहिलो खेलमा श्रीलंका न्युजिल्याण्डसँग १० विकेटको लज्जास्पद हार स्विकार्न बाध्य भएको थियो भने अफगानिस्तानले पनि अष्ट्रेलियाको हातबाट ७ विकेटको फराकीलो अन्तरमा पराजित भएको थियो।
