धनगढी - सुदूरपश्चिम प्रदेश सभामा छलफलमा रहेको प्रदेश सरकारको आगामी आर्थिक वर्षको नीति तथा कार्यक्रममा प्रमुख प्रतिपक्षी दल नेपाली कांग्रेसले संशोधन प्रस्ताव दर्ता गरेको छ । प्रमुख प्रतिपक्षी दलका प्रदेश सांसद गोविन्दराज बोहरा प्रस्तावक र कुमारी नन्दा बम समर्थक रहेको नीति तथा कार्यक्रममाथिको संशोधन प्रस्ताव प्रदेश सभा सचिवालयमा दर्ता भएको सभामुख अर्जुनबहादुर थापाले प्रदेश सभा बैठकमा जानकारी दिए ।
प्रमुख प्रतिपक्षी दलका सांसदहरूले प्रदेश सभा नियमावली २०७४ को नियम ३७ अनुसार प्रस्ताव दर्ता गरेका हुन् । प्रतिपक्षी दलका सासंदहरूले संशोधन प्रस्ताव नीति तथा कार्यक्रम पेश भएका भोलिपल्टै नै गर्न चाहेका थिए । तर, सभामुख थापाले गर्न मिल्ने नमिल्नेबारे राय लिएर मात्रै दर्ता गर्न दिने भनेपछि प्रमुख प्रतिपक्षी दलले आज बिहीबारसम्म कुरेको हो ।
प्रमुख प्रतिपक्षी दलको तर्फबाट दर्ता भएको संशोधनको प्रस्तावमा नीति तथा कार्यक्रमको बुँदा नम्बर ९३ र ९४ मा संशोधन हुनुपर्ने उल्लेख छ । उक्त संशोधन प्रस्तावमा नीति तथा कार्यक्रमको बुँदा नम्बर ९३ मा रहेको ‘मुख्य मन्त्री कप अन्तर प्रदेश खेलकुद प्रतियोगितालाई निरन्तरता दिइनेछ’ को सट्टामा ‘मुख्यमन्त्री कप खेलकुद प्रतियोगितालाई निरन्तरता दिइनेछ र खेलाडी छनोट गर्दा जिल्लास्तरीय प्रतियोगितामार्पmत छनोट गर्ने नीति अवलम्बन गरिने’ भन्ने उल्लेख हुनुपर्ने माग गरिएको छ ।
त्यसैगरी, बुँदा नम्बर ९४ मा रहेको ‘प्रदेशको विकास र स्वरोजगारीलाई टेवा पुग्ने गरी मुख्य मन्त्री स्ववं सेवा कार्यक्रम तर्जुमा गरी सञ्चालन गरिनेछ’ भन्ने वाक्यांश हटाइनुपर्ने प्रतिपक्षी दलको माग रहेको छ ।
प्रदेश सरकारको ठूलो धनराशि स्वयंसेवक परिचालनका नाममा कार्यकर्तालाई वितरण हुने सम्भावना रहेकाले उक्त बुँदा हटाउन संशोधन प्रस्ताव दर्ता गरिएको प्रस्तावक तथा प्रदेश सांसद गोविन्दराज बोहराले बताए । प्रस्तावमाथि नीति तथा कार्यक्रममाथिको छलफल सकिएपछि प्रदेश सभामा छलफल हुने प्रदेश सभा सचिवालयले जानकारी दिएको छ ।
