धनगढी - हिजाे बिहीबार साँझ आएको हावाहुरीका कारण कैलाली कञ्चनपुरको जनजीवन अस्तब्यस्त भएको छ। हावाहुरीले कैलाली र कञ्चनपुरका विभिन्न स्थानमा सयौँ विजुलीका पोलहरू ढालिदिएको छ।
जसका कारण कैलाली कञ्चनपुरसँगै सुदूरपश्चिमका पहाडी जिल्लामा समेत विद्युत सेवा अवरुद्ध हुन पुगेको विद्युत प्राधिकरण सुदूरपश्चिमका प्रमुख सतिश कर्णले जानकारी दिएका छन्।
रुखहरु ढलेर सडकमा परेका कारण दुवै जिल्लाका दर्जनौँ सडक अवरुद्ध हुँदा त्यहाँ सवारीसाधन सञ्चालनमा कठिनाइ भइरहेको त्यहाँका सुरक्षा अधिकारीहरूले जनाएका छन्। ती सडकहरू खुलाउने काम जारी रहेको कैलालीका एसपी सुदीप गिरीले जनाए।
हावाहुरीले सबैभन्दा बढी कैलालीको धनगढीमा क्षति पुर्याएको विवरणहरू आएका छन्। यद्यपि, अहिलेसम्म कहाँ कति क्षति भयो भन्ने सम्पूर्ण विवरण आइसकेको छैन। कैलालीका प्रमुख जिल्ला अधिकारी यज्ञराज बोहराले क्षतिको विवरण संकलन भइरहेको जानकारी दिए। स्थानीय तहसँगको समन्वयमा क्षतिको विवरण संकलन गर्ने कार्य भइरहेको हो।
सरोेकारवाला निकाय उद्धारमा केन्द्रित भएका छन्। धनगढी उपमहानगरपालिकाका मेयर नृपबहादुर वडका अनुसार हावाहुरीले धनगढीमा दर्जनौँ घर तथा पसलका छाना उडाइदिएको छ। नगरपालिकाले क्षतिको विवरण संकलन गर्नका साथै पीडित परिवारलाई राहत वितरणको कार्य शुरू गर्दैछ।
जाग्यो प्रदेश सरकार
सुदूरपश्चिम प्रदेश सरकार हावाहुरीबाट प्रभावितको उद्धारमा लागेको छ। हावाहुरी प्रभावितका लागि सुदूरपश्चिम प्रदेश सरकारले राहत तथा उद्धारको कार्य शुरु गर्ने भएको छ। शुक्रबार विहान आयोजित पत्रकार सम्मेलनमा आन्तरिक मामिला तथा कानुन मन्त्री प्रकाशबहादुर शाहले उद्धार तथा राहत वितरणको कार्यमा कुनै पनि कसर बाँकी नराख्ने बताए।
उद्धार तथा क्षतिको विवरण संकलन भइरहेको भन्दै उनले हावाहुरीका कारण अवरुद्ध भएका सडक, विद्युत, खानेपानी, टेलिफोनसमेत तत्काल सुचारु गर्ने गरी काम भइरहेको बताए।
नेपाली काँग्रेसले पनि कैलाली र कञ्चनपुर हावाहुरीबाट पीडितको
राहत र उद्धारमा जुट्न नेता तथा कार्यकर्तालाई आग्रह गरेको छ।
घाइतेको कहाँ हुँदैछ उपचार ?
हावाहुरीको कारण दुई जनाको मृत्यु भएको छ भने १ सय १ जना घाइते भएका छन्। हावाहुरीका कारण कैलालीको टिकापुर नगरपालिका–२ राजीपुरका ४७ वर्षीय लाहानु चौधरी र गोदावरी नगरपालिका–८ बस्ने ३५ वर्षीय वीरबहादुर चौधरीको मृत्यु भएको छ।
घाइतेमध्ये ८३ जना विभिन्न अस्पतालमा उपचारपछि घर फर्किएको प्रहरीले जनाएको छ। हावाहुरीमा परी कैलालीमा घाइते भएका ७८ जनामध्ये छ जनाको सेती अञ्चल अस्पतालमा तथा दुई जनाको कोहलपुर मेडिकल कलेजमा उपचार भइरहेको छ। दुई जनालाई थप उपचारको लागि भारत रिफर गरिएको र ६८ जना उपचार पश्चात घर फर्किएको प्रहरीले जनाएको छ।
साथै हावाहुरीमा परी कञ्चनपुरमा घाइते भएका २३ जनालाई उपचारका लागि महाकाली अञ्चल अस्पताल पठाइएकोमा १५ जना उपचारपश्चात डिस्चार्ज भएका छन्। आठ जनालाई थप उपचारका लागि सेती अञ्चल अस्पताल रिफर गरिएको छ।
