काठमाडौं– रोमाञ्चक खेलमा भारतले अष्ट्रेलीयामाथि जित हात पारेको छ। बिश्वकपअन्तरगत १४ औँ खेलमा आइतबार भारतले अष्ट्रेलीयालाई ३६ रनले पराजित गर्यो।
भारतले दिएको ३ सय ५३ रनको बिशाल योगफल पछ्याउने क्रममा अष्ट्रेलीया ५० ओभरमा १० विकेट गुमाउँदै ३ सय १६ रनमै रोकीयो। निर्धारित ५० ओभर व्याटिङ गर्ने क्रममा उसले सन्तुलित व्याटिङ गर्न नसक्दा हारको सामना गर्नुपर्यो।
भारतलाई जित दिलाउने क्रममा जसप्रित बुमराह र भुवनेश्वर कुमारले समान ३–३ अष्ट्रेलियन व्याट्सम्यानहरुलाई पभेलियन फर्काए। यस्तै युजवेन्द्र चहलले पनि २ अष्ट्रेलीयन खेलाडिलाई आउट गरे।
व्याटिङतर्फ अष्ट्रेलीयाका लागि पुर्वकप्तान स्टिभ स्मिथले ६९ रन बनाए। ७० बलको सामना गरेका उनले ५ चौका र १ छक्का प्रहार गरेका थिए। त्यस्तै एलेक्स कैरेले ३२ बलमा आक्रामक ५२ रनको पारि खेल्ने क्रममा ५ चौका र १ छक्का प्रहार गरे।
ओपनर डेभिड वार्नरले पनि ८४ बलमा ५ चौकाको मदतमा ५६ रन बनाए भने उस्मान ख्वाजाले ३९ बलमा ४२ रन बनाए।
यसअघि टस जितेर पहिले व्याटिङ गरेको भारतले उत्कृष्ट खेल प्रदर्शन गर्दै ३ सय ५२ रन बनाएको थियो। निर्धारित ५० ओभरमा ५ विकेट गुमाउदै बिशाल योगफल बनाउने क्रममा भारतिय व्याट्सम्यानहरुले आक्रामक खेल देखाए।
ओपनर शिखर धवनको शतक र कप्तान बिराट कोहलीको आक्रामक अर्धसतकको मदतले भारतले अष्ट्रेलियन बलिङ ‘लाइन अप’ धरासायी बनायो। १ सय १७ रनको उत्कृष्ट पारी खेल्ने क्रममा धवनले १ सय ९ बल खेल्दै १६ वटा चौका प्रहार गरे।
कप्तान कोहलीले पनि आइतबार राम्रो व्याटिङ गरे। ८२ रनको शानदार पारी खेल्ने क्रममा उनले ७७ बल खेल्दै ४ चौका र १ छक्का प्रहार गरे।
पहिलो विकेटको लागि शिखर धवनसँग १ सय २७ रनको साझेदारी गरेका रोहित शर्माले पनि अर्धसतकिय पारी खेल्दै ५७ रन बनाए। ७० बलको सामना गरेका उनले ३ चौका र १ छक्का प्रहार गरेका थिए।
यसबाहेक अलराउन्डर हार्दिक पाण्ड्या, पुर्वकप्तान महेन्द्र सिंह धोनी र केएल राहुलले पनि अष्ट्रेलियन बलरहरुमाथी आक्रमक रवैया प्रर्दशन गरेका थिए। २७ बलमा ४८ रनको बिष्फोटक पारि खेल्ने क्रममा पाण्ड्याले ४ चौका र ३ छक्का प्रहार गरे।
यस्तै धोनीले पनि छोटोमिठो पारी खेले। २७ रन बनाउन केवल १४ बलमात्र खेलेका धोनीले ३ चौका र १ छक्का प्रहार गरे भने केएल राहुलले ३ बलमै १ चौका र १ छक्काको मदतले ११ रन बनाए।
बलिङतर्फ अष्ट्रेलीयाका मार्कस स्टोइन्सले २ विकेट हात पारे भने प्यट कुमिन्स, मिचेल स्टार्क र नाथन कुल्टर नाइलले समान १–१ विकेट हात पारे।
