वीरगंज – प्रदेश २ का मुख्यमन्त्री लालबाबु राउतले वर्षौदेखि विभेदमा परेको थारु समुदायको अधिकार प्राप्तिका लागि संघर्षको विकल्प नरहेको बताएका छन्। थारु आयोगले आज जनकपुरमा आयोजना गरेको छलफल तथा अन्तरक्रिया कार्यक्रममा मुख्यमन्त्री राउतले मुलुक संघीय गणतन्त्रमा गए पनि कार्यन्वयनमा इमान्दारिता नभएकाले संघर्ष अपरिहार्य रहेको उल्लेख गरे।
संघर्ष नगरेसम्म कुनै समुदायले अधिकार प्राप्त गरेको इतिहास नभएको बताउँदै मुख्यमन्त्री राउतले आफ्नो भविष्य परिवर्तनका लागि जुट्न थारु समुदायलाई आग्रह गरे। आयोग गठनमा समेत विभेद भएको बताउँदै उनले महिला आयोग र दलित आयोगलाई जस्तो अधिकार थारु, मधेसी, मुस्लिम आयोगहरुलाई नदिइएको बताए।
समुदायको अधिकारको लागि लड्दा रेशम चौधरीलाई झुठा मुद्दा खेप्नु परेको उल्लेख गर्दै उनले भने, ‘आन्दोलनको नाममा दशौँ हजार मान्छे मार्नेहरु राज्य सत्ता सञ्चालन गर्ने तर निर्दोष रेशम चौधरीलाई जेलमा बस्नुपर्ने कहाँको न्याय हो?’ आयोग गठन हुँदैमा थारु समुदायको भविष्य परिवर्तन नहुने उनको भनाइ थियो।
मुख्यमन्त्री राउतले प्रदेश २ सरकारले सबै जातजातिलाई समान दृष्टिले हेर्ने चर्चा गर्दै सबै निकायमा जनसंख्याको आधारमा प्रतिनिधित्वको सुनिश्चितता गरिने बताए। आयोगका अध्यक्ष विष्णुप्रसाद चौधरीको अध्यक्षतामा भएको कार्यक्रममा प्रदेश २ का थारु अगुवा, जनप्रतिनिधि लगायतको उपस्थिति रहेको थियो।
