वीरगञ्ज - प्रदेश २ सरकारले आर्थिक वर्ष २०७६/७७ का लागि ३८ अर्ब ७२ करोड ५६ लाख ६१ हजार रुपैयाँबराबरको बजेट सार्वजनिक गरेको छ। प्रदेश २ सरकारका आर्थिक मामिला तथा योजनामन्त्री विजयकुमार यादवले हिजो आइतबार प्रदेश सभामा उक्त बजेट प्रस्तुत गरेका हुन्।
आर्थिक वर्ष २०७६/७७ को नीति तथा कार्यक्रम कार्यान्वयनका लागि प्रदेश सरकारले कुल विनियोजित बजेटमध्ये चालू खर्चतर्फ १९ अर्ब २६ करोड १ लाख ९७ हजार, पूँजीगततर्फ १९ अर्ब २६ करोड ५४ लाख ६४ हजार र वित्तीय व्यवस्थातर्फ २० करोड बजेट छुट्याएको छ। बजेटमा जनतासँग कार्यक्रमका लागि १२ लाख, न्यायपूर्ण समाज निर्माणका लागि आवश्यक बजेट छुट्याइने, प्रत्येक निर्वाचन क्षेत्रमा २ करोड, भ्रष्टाचार नियन्त्रणमा शून्य सहनशिलता, कर्मचारीलाई एक महिनाको अतिरिक्त तलबलगायतका कुराहरू पनि बजेटमा परेका छन्।
त्यस्तै, विद्यालयमा बालिका शौचालयका लागि ५ करोड, घुम्ती शौचालय सञ्चालन, मुख्यमन्त्री किसान आयोजनाका लागि २० करोड, मत्स्य विकास कोषका लागि १४ करोड, माटो परीक्षणका लागि बजेट, शीत भण्डारका ४० करोड, स्वच्छ खानेपानीका लागि विशेष योजनालगायतका शीर्षकहरू पनि बजेटमा समेटिएका छन्।
त्यसैगरी, ‘खेत–खेतमा पानी, हातहातमा काम’ का लागि प्रदेश सरकारले बजेट छुट्याएको छ। जैविक मल कारखानाका लागि पनि सरकारले बजेट छुट्याएको छ। प्रदेशलाई अँध्यारोमुक्त घोषणाका लागि दुई ठूला योजनामा ३ सय मेगावाटको सोलार केन्द्र स्थापना गर्ने बताएका छन्। प्रादेशिक पारवहन बोर्डको गठन गरी प्रादेश सरकारले प्रादेशिक बस सेवा पनि सञ्चालमा ल्याउने बजेटमा उल्लेख छ।
