काठमाडौँ, २ माघ – चलचित्र ‘बैना’ माघ ११ गतेबाट प्रदर्शनमा आउने भएको छ। लिङ्देन फिल्मसकाे ब्यानरमा चलचित्र ‘बैना’ निर्माण भएको हो। हालै राजधानीमा पत्रकार भेटघाट कार्यक्रम आयोजना गरी निर्माण पक्षले साे कुराको जानकारी गराएको छ।
चलचित्र ‘बैना’मा नायक सुबास मेचे, रञ्जिता लिम्बू, सुरवीर पण्डित, भूपेन्द्र लिङ्देन, राजु लिङ्देन, विश्व मुखिया, उदय सुब्बा, युमारानी लिम्बू, सन्तु मगर लगायतका कलाकारको अभिनय रहेको छ। दिलप्रकाश याक्सोको निर्देशनमा चलचित्र तयार भएको हो।
विजय केरुङको पटकथा र संवाद रहेको चलचित्र ‘बैना’ त्रिकोणात्मक प्रेमकथामा तयार भएको छ। चलचित्रमा विकास चौधरीको सङ्गीत, राजु किरातीको द्वन्द्व र कमल राईको नृत्य रहेको छ।
चलचित्रमा भूपेन्द्र लिङ्देनको प्रस्तुति रहेको छ। हिमाली लिङ्देन, राजु लिङ्देन, धनबहादुर याक्सो र बिना पालुङ्वाले संयुक्त रूपमा चलचित्र निर्माण गरेका हुन्। यस चलचित्रको छायाङ्कन पूर्वाञ्चलको दमक, धनकुटा र इलाममा गरिएको छ।
