रसुवा - हरेक वर्ष झैँ यस वर्ष पनि जनैपूर्णिमा नजिकिँदै गर्दा गाेसाइँकुण्ड जानेहरूकाे भीड लाग्न थालेकाे छ। जनैपूर्णिमामा देवीदेवताका मन्दिर तथा तीर्थस्थलहरूमा गइ जनै लगाउने प्रचलन बढ्दै गएकाे छ। यस अवसरमा यहाँ विशेष गरेर बर्सेनि यहाँ मेला लाग्ने गर्छ।
गाेसाइँकुण्ड मेलामा तीर्थ गर्न जाने यात्रुका लागि उपचार सेवा प्रदान गर्न धार्मिक क्षेत्रका तीन स्थानमा शनिबारदेखि स्वास्थ्य शिविर सञ्चालन गरिएको छ। गोसाइँकुण्ड क्षेत्र विकास समितिका अध्यक्ष सञ्जीव डीएमका अनुसार आकस्मिक रूपको प्राथमिक उपचार सेवाका लागि गोसाइँकुण्डमा हिमालय उद्धार सङ्घ, चोलाङपाटीमा नेपाली सेना कालीजङ्ग गण र चन्दनबारीमा पाटन अस्पताल मातहतको अक्सफोर्ड युनिभर्सिटी क्लिनिकल रिर्सज युनिट नेपालले स्वास्थ्य शिविर सञ्चालन गरी सेवा प्रदान गर्न थालिसकेका छन्।
समुद्री सतहदेखि १४ हजार १ सय फिटको उचाइमा अवस्थित पवित्र धार्मिक एवं पौराणिक गोसाइँकुण्ड मेलामा स्नान र पूजाआजाका लागि १५ हजार भक्तजन निलाद्री पर्वत पुग्ने लक्ष्यका साथ प्राथमिक उपचारको साथै उद्धार समेतको व्यवस्था मिलाइसकिएकाले गोसाइँकुण्डको यात्रा गर्न सम्पूर्ण तीर्थालुसमक्ष आग्रह गरिएको अध्यक्ष डीएमले बताए।
दुई दशकदेखि पवित्र तीर्थको बढी लेक लाग्ने स्थानमै शिविरको माध्यमबाट अक्सिजनसहितको उपचार सेवा दिँदै आएको हिमालय उद्धार सङ्घले यस वर्ष ६ दक्ष चिकित्सक सहितको टोली परिचालन गरेकाले आकस्मिक उपचार सेवामा कुनै कमी नआउने गोसाइँकुण्ड क्षेत्र विकास समितिले जनाएको छ।
कुनै यात्रुलाई लेक लाग्ने समस्या आइहालेमा नेपाली सेना लगायतका सुरक्षा अङ्गद्वारा तुरून्तै उद्धार गरी होचो भू–भागमा पुर्याउने व्यवस्थासमेत मिलाइसकिएको बताइएको छ। यही २६ गते आइतबारदेखि ३० गते जनैपूर्णिमाको दिनसम्म विशेष मेलामा टाढा–टाढाबाट आउने तीर्थयात्रीका लागि उद्धारको सहयोग निर्वाध रूपले हुने स्थानीय प्रशासनले जनाएको छ।
यात्रुलाई खान तथा बस्न धुञ्चेको तिवारीबगरदेखि गोसाइँकुण्डसम्म ८५ अस्थायी छात्रा (थर्कु) र स्थायी रूपका पक्की १७ होटल सञ्चालनमा रहेको बताइएको छ। यात्रुको सुरक्षाका लागि विशेष सुरक्षा व्यवस्था मिलाई सुरक्षाकर्मीसमेत परिचालन भइसकेको बताउँदै जिल्ला प्रहरी प्रवक्ता प्रहरी इन्स्पेक्टर ओमप्रसाद वाग्लेले सुरक्षाको थप जानकारीका लागि नजिकको प्रहरी बिट वा जिल्ला प्रहरी कार्यालय रसुवाको टेलिफोन नम्बर ०१०–५४०१९९ टोल फ्री नम्बर १००, प्रहरी प्रवक्ताको मोबाइल नं ९८५१२५४९६० र ट्राफिक प्रहरीको मोबाइल नं ९८५१२८२६६८ मा सम्पर्क राख्न सम्पूर्ण यात्रुमा आग्रह गरिएको बताए। (रासस)
