काठमाडौँ, १५ माघ – चलचित्र ‘जोकर जादुगर २’ को ट्रेलर सार्वजनिक भएको छ। यस चलचित्र फागुन ३ गतेदेखि प्रदर्शनमा आउने भएको छ। ‘जोकर जादुगर २’को ट्रेलरमा पनि कमेडी देख्न सकिन्छ। ट्रेलर र चलचित्र दुवै कमेडी रहेको यसमा कलाकार महादेव त्रिपाठी कसरी जोकर बने भन्ने कथावस्तुलाई प्रस्तुत गरिएको छ।
निर्माण युनिटले यस चलचित्रको एउटा गीत भर्खरै सार्वजनिक गरेको छ। गीत सार्वजनिक भएको केही दिनपछि चलचित्रको ट्रेलर सार्वजनिक भएको हो। याक इन्टरटेन्मेन्ट प्रा.लि.को प्रस्तुति रहेको यस चलचित्रलाई महादेव त्रिपाठीले निर्देशन गरेका हुन्।
रिच इन्टरटेन्मेन्ट अर्थात् करण श्रेष्ठ क्रेजीले वितरण गर्ने यस चलचित्रमा महादेवका साथै सिम्पल खरेल, सुरेन्द्र केसी (मुलाको साग), शिवशंकर रिजाल, अञ्जु थापा, दीपेन शाह, बालकलाकार रिहानराज गिरी, नवराज श्रेष्ठ, लक्ष्मी श्रेष्ठ, राजेन्द्र गिरी, विनोद राई लगायतका कलाकारको अभिनय रहेको छ। यसमा मोडल सिम्पल खरेलको डेब्यु रहनेछ।
त्यस्तै विशेष पन्तको लेखन रहेको यस चलचित्र गणेश श्रेष्ठ, कर्णबहादुर तामाङ, केदारप्रसाद रइला, सामन र रेहान तथा कुमार सिलवालको संयुक्त निर्माणमा बनेको हो। चलचित्रमा नेपाली समाजको यथार्थपरक घटनालाई हास्यका माध्यमबाट उजागर गरिएको निर्देशकले बताए। चलचित्रमा मधुर बस्नेतको छायाङ्कन तारा किम्बेको सम्पादन रहेको छ।
त्यसैगरी चलचित्रमा सुगम पोख्रेल, टंक बुढाथोकी, कमल खत्री र धु्रवराज विश्वको संगीत रहेको छ। शिव विक, दीपकमदन सिंह र सोम लामाको कोरियोग्राफी रहेको यस चलचित्रमा सम्राट बस्नेतको द्वन्द्व छ।
https://youtu.be/dAU4I-Uidjc
