रौतहटमा वन सुरक्षा गस्तीटोली र तस्कर समूहबीच गोली हानाहान भएको छ। गुजरा नगरपालिका– २ अञ्जुमन सामुदायिक वनक्षेत्रभित्र आइतबार साँझ उनीहरुबिच दोहरो गोली हानाहान भएको हो।
गस्तीटोलीले तीन राउण्ड र तस्करले दुई राउण्ड गोली प्रहार गरेको थियो। सेक्टर वन कार्यालय चोंचाका अधिकृत राजेशकुमार साहले गोली हानाहानको क्रममा सुरक्षाटोलीतर्फ कुनै क्षति नभएको र तस्कर समूहको खबर नभएको बताएका छन्। भाग्नेक्रममा तस्करले एक थना भरुवा बन्दुक छोडेको अधिकृत साहले जानकारी दिए।
त्यस्तै लकडाउनको समयमा वन सुरक्षागस्ती टोलीले करिब १ सय क्युफिट अवैध सालको काठसहित ३ जनालाई पक्राउ गरेको प्रमुख सिंहले जानकारी दिए। उनीहरुमाथि आवश्यक कानुनी कारवाही भइरहेको डिभिजन वन कार्यालय रौतहटले जनाएको छ।
