नेपालमा शनिबार थप १ सय ८९ जनामा कोरोना संक्रमण देखिएको छ । जसमध्ये १ सय ८५ जना पुरुष र ४ जना महिला छन् ।
पछिल्लो विवरण अनुसार, सबैभन्दा धेरै काठमाडौंको राष्ट्रिय जनस्वास्थ्य प्रयोगशालामा गरिएको परिक्षणमा १ सय २४ जनामा कोरोना पोजिटिभ देखिएको हो । रुपन्देहीको प्रयोगशालामा गरिएको परिक्षणमा २९ जना तथा कर्णाली स्वास्थ्य विज्ञान प्रतिष्ठानमा गरिएको परिक्षणमा १४ जनामा कोरोना संक्रमण देखिएको छ ।
यसैगरी धरानस्थित विपि कोइराला स्वास्थ्य विज्ञान प्रतिष्ठानमा गरिएको परिक्षणमा ९, दांगस्थित राप्ती स्वास्थ्य विज्ञान प्रतिष्ठानमा गरिएको परिक्षणमा ८, विरगञ्जको नारायणी अस्पतालमा गरिएको परिक्षणमा ३ र विराटनगरको कोशी अस्पतालमा गरिएको परिक्षणमा २ जनामा कोरोना पोजिटिभ देखिएको छ ।
स्वास्थ्य तथा जनसंख्या मन्त्रालयले आयोजना गर्ने दैनिक ब्रिफिङ्ग कार्यक्रममा शनिबार अपरान्ह मन्त्रालयका प्रवक्ता डा. विकास देवकोटाले १ सय ८९ जना कोरोना संक्रमित थपिएको जानकारी गराएका हुन् । यो सँगै नेपालमा संक्रमितको संख्या १ हजार ४ सय १ पुगेको छ । जसमध्ये १ हजार २ सय ८८ जना पुरुष र १ सय १३ जना महिला छन् ।
शनिबार संक्रमित देखिएकामध्ये सबैभन्दा धेरै कपिलवस्तुका १ सय ९ जना छन् । यसैगरी सर्लाहीका १७, दैलेखका १४, सिराहाका ११, सप्तरीका ९, धनुषाका ७, दांगका ५, महोत्तरीका ४ जना छन् । यस्तै पर्सा र संखुवासभाका दुइ दुइ जना तथा झापा, ललितपुर र बाराका एक एक जना छन् । संखुवासभामा पहिलो पटक कोरोना संक्रमण देखिएको हो ।
संक्रमितहरु मध्ये शनिबार १३ जना उपचारपछि घर फर्किएका छन् । काठमाडौंको टेकु अस्पतालबाट २ जना र कोभिड १९ युनिफाईड अस्पताल, बलम्बुबाट ११ जना डिस्चार्ज भएको प्रवक्ता देवकोटाले जानकारी दिए । योसँगै निको हुनेको संख्या २ सय १९ पुगेको छ, जसमध्ये १ सय ७२ जना पुरुष र ४७ जना महिला छन् ।
यसैगरी हालसम्म संक्रमण देखिएकामध्ये १ हजार १ सय ७६ जनाको देशका विभिन्न अस्पतालमा आइसोलेशनमा राखेर उपचार भइरहेको छ । प्रदेश नम्बर १ मा १ सय ३० जना, प्रदेश नम्बर २ मा ४ सय ४२ जना, बाग्मती प्रदेशमा १५ जना, गण्डकी प्रदेशमा १७ जना र प्रदेश नम्बर ५ मा ४ सय ९६ जना, कर्णाली प्रदेशमा ६१ जना र सुदुरपश्चिम प्रदेशमा १५ जनाको उपचार भइरहेको स्वास्थ्य मन्त्रालयले जनाएको छ ।
कोरोनाभाइरसका कारण नेपालमा अहिलेसम्म ६ जनाको मृत्यू भएको छ ।
