नेपाली राष्ट्रिय टिमका चार खेलाडीले आफूहरुमाथि गरिएको कारवाही र खेलाडीको वर्गीकरणमा पुनः विचार गर्न नेपाल क्रिकेट संघ (क्यान)लाई आग्रह गरेका छन् ।
कारवाही गरिएका कप्तान ज्ञानेन्द्र मल्ल, उपकप्तान दीपेन्द्र सिंह ऐरी, सोमपाल कामी र कमलसिंह ऐरीले आज संयुक्त पत्राचार गर्दै आफूहरुमाथि गरिएको कारवाही र खेलाडीको वर्गीकरणमा पुनः विचार गर्न क्यानलाई आग्रह गरेका हुन् । उनीहरुले संवादका लागि आफूहरु तयार रहेको बताएका छन् ।
पत्रकार सम्मेलनमा निवर्तमान कप्तान ज्ञानेन्द्र मल्लले आफूहरुमाथि गरिएको कारवाही र खेलाडीको वर्गीकरणमा पुनः विचार गर्न आग्रह गरे । उनले भने, ‘कारवाही पुनः विचार गरियोस् । महत्वपूर्ण प्रतियोगिता आइरहेको छ ।’
यति बेला आफूहरू टि–२० ग्लोबल क्वालिफायर र डब्लुडब्लुजस्ता महत्वपूर्ण प्रतियोगिताको तयारीमा व्यस्त हुनुपर्ने ठाउँमा आफैं स्पष्टीकरण दिइहिँड्नुपर्ने अवस्था आएको भन्दै उनले दुख व्यक्त गरे ।
उनले यस्ता आफू कप्तान हुँदा सम्पूर्ण खेलाडीको प्रतिनिधित्व गरेकोले गुट बनाउन आवश्यक नरहेको बताए ।
उनीहरुले अधिकारका लागि आवाज उठाएकै आधारमा आफूहरूमाथि कारबाही गरिएको गुनासो गरे । आफ्नो सबै इच्छा आकांक्षा मारेर क्रिके टमा लागेका खेलाडीहरूलाई यसरी कारबाही हुँदा नयाँ पुस्ता क्रिकेटमा आकर्षित हुन नसक्ने बताए।
‘के हामीले नेपाली क्रिकेटमा आजसम्म गरेको समर्पणको सम्मान यही हो ? आफ्नो हकअधिकारका लागि आवाज उठाएकै आधारमा देशका बर्ष खेलेका, आफ्नो सबै इच्छा आकांक्षा मारेर क्रिकेटमा लागेका खेलाडीहरूलाई यसरी कारबाही हुन्छ भने भोलिका दिनमा नयाँ पुस्ता कसरी आकर्षित होला ?’ उनीहरूले भनेका छन् ।
उनीहरुले पछिल्लो समय खेलाडीको ग्रेडिङलाई लिएर देखिएको विवादबारे पनि बोलेका छन् । ‘पछिल्लो समय खेलाडीहरुको ग्रेडिङलाई लिएर जुन विवाद देखिएको छ, यसले हामीलाई अत्यन्तै दुखी बनाएको छ’, उनीहरुले जारी गरेको विज्ञप्तिमा भनिएको छ, ‘हामीले बुझेको खेलाडीहरूको ग्रेडिङ उसले पाउने तलब मात्रै होइन । देशका लागि गरेको योगदानको कदर पनि हो, अझै राम्रो गर्न प्रोत्साहन पनि हो । ’
क्यानले गरेको ग्रेडिङमा देखिएका समस्या समाधान गर्दै अन्यायमा परेका खेलाडीहरूको ग्रेड बढाउँदै लाने भनिए पनि त्यसलाई क्यानले बेवास्ता गरेको उनीहरुको गुनासो छ ।
विवाद
नेपाल क्रिकेट संघ (क्यान) को क्यानको बुधबार बसेको बोर्ड बैठकले कप्तान ज्ञानेन्द्र मल्ल र उपकप्तान दीपेन्द्र सिंह ऐरीलाई कारबाही गर्दै पदमुक्त गर्नुका साथै नयाँ कप्तानमा सन्दीप लामिछानेलाई चयन गरेको थियो ।
साथै, अनुशासन उल्लंघन आरोपमा मल्ल र ऐरीसहित सोमपाल कामी र कमलसिंह ऐरीलाई कारबाही गर्दै २०२२ को सेन्ट्रल कम्ट्रयाक्टमा ६ महिना सहभागी नगराउने निर्णय गरेको थियो ।
जसको खेलाडी, समर्थन र क्यानकै केही बोर्ड सदस्यले विरोध जनाउँदै आएका छन् । क्रिकेट खेलाडीहरुमाथिको कारवाही फिर्ता लिन चौतर्फी दवाव छ ।
राजनीतिक चासो
यसअघि शुक्रबार बिहानै नेकपा अध्यक्ष प्रचण्डले राष्ट्रिय क्रिकेट टिमका खेलाडीमाथि गरिएको कार्बाहीबारे प्रधानमन्त्री शेरबहादुर देउवाको ध्यानाकर्षण गराएका थिए ।
शुक्रबार दिउँसो क्यानका पदाधिकारीहरुलाई बोलाएर युवा तथा खेलकुद मन्त्री महेश्वरजंग गहतराजले क्रिकेट खेलाडीमाथि गरिएको कारबाहीमा पुनः विचार गर्न आग्रह गरेका थिए ।
हेर्नुहोस् चार खेलाडीले जारी गरेको विज्ञप्तिको पूर्णपाठः
नेपाली क्रिकेटमा विकसित भइरहेको पछिल्लो घटनाक्रमले हामीलाई निकै दुःखी बनाएको छ । यति बेला हामी खेलाडीहरु T-20 ग्लोबल क्वालिफायर र WCLC जस्ता महत्वपूर्ण प्रतियोगिताहरुको तयारीमा व्यस्त हुन पाउनुपर्ने थियो । तर आफैं स्पष्टीकरण दिइहिँड्नु पर्ने अवस्था बनेको छ, यो राम्रो लागेको छैन ।
तर नेपाल क्रिकेट संघ (क्यान)को पछिल्लो निर्णयपछि धेरै पत्रकार साथीहरुले चासो राख्नुभयो, हाम्रो धारणा माग्नुभयो । क्रिकेट संघको पत्र आओस्, त्यसपछि आफ्नो धारणा राखौंला भन्ने थियो । तर क्रिकेट संघले विज्ञप्ति नै जारी गरेर आफ्नो निर्णय सार्वजनिक गरिसकेको र पदाधिकारीहरुले पनि त्यसबारे सञ्चार माध्यमहरुमा आफ्नो धारणा ल्याइरहनु भएकाले हामीले पनि केही भन्नु उपयुक्त हुन्छ भन्ने लागेर यो पत्रकार सम्मेलन आयोजना गरेका हौं ।
नेपाली क्रिकेट कुन अवस्थाबाट आजको स्थितिमा आयो, हामी खेलाडीहरुले कस्तो कठिन अवस्थामा पनि क्रिेकट खेलिरह्यौं, तपाईंहरुलाई भनिरहनु नपर्ला । हामीले कहिल्यै मैले के पाउँछु भनेर हेरेनौं । तलब आउँछ कि आउँदैन ? सेवा सुविधा के पाउँछौं ? सोधेनौं, खोजेनौं । हामी खेलाडीहरुको एउटै लक्ष्य हुन्थ्यो, आज पनि छ, कसरी मैदानमा राम्रो प्रदर्शन गर्ने, देशलाई जिताउने र सारा नेपालीहरुलाई खुसी दिने ।
हिजो हामी डिजिभन फाइभमा थियौं । खेलाडीहरुको मेहनत र सबैको साथ सहयोगले नेपालले T-20 विश्वकप खेल्यो, ODI नेशनको मान्यता पायो । केही ऐतिहासिक सिरिज पनि जित्यौं । यो सफलतालाई निरन्तरता दिने मात्र होइन, अझ माथि लैजान सकियोस् हामी चाहन्छौं । तर यसका लागि मैदानमा खेलाडीहरुको मेहनतसँगै मैदान बाहिर पनि त्यही अनुसार वातावरण बनोस् भन्ने चाहन्छौं ।
तर पछिल्लो समय खेलाडीहरुको ग्रेडिङलाई लिएर जुन विवाद देखिएको छ, यसले हामीलाई अत्यन्त्यै दुःखी बनाएको छ । हामीले बुझेको खेलाडीहरुको ग्रेडिङ उसले पाउने तलब मात्र होइन, देशका लागि गरेको योगदानको कदर पनि हो, अझ राम्रो गर्न प्रोत्साहन पनि हो ।
नेपाली क्रिकेटमा सन् २०१५ तिर ग्रेडिङको सुरुवात भयो । हामीले बुझेसम्म नेपाल T-20 विश्वकपमा पुगपेछि आईसीसीले प्लेयर्स बेनिफिट फण्डबाट ५० हजार डलर टिमलाई खर्च गर्ने गरी उपलब्ध गराएको थियो । त्यसबेला तत्कालीन क्यान, प्रशिक्षक, कप्तान, उपकप्तान र केही सिनियर खेलाडीहरुबीच छलफल गरेर यो रकमलाई राष्ट्रिय टिमका १४/१५ खेलाडीलाई मात्र नभई क्याम्पमा रहेका अन्य खेलाडीसम्म पनि समेटेर अगाडि बढ्ने निष्कर्षमा पुग्यौं । त्यसअनुसार खेलाडीहरुको ग्रेडिङ गर्ने र मासिक तलब लिने व्यवस्था भयो । यसले हामी खेलाडीहरुको मनबल बढ्ने हाम्रो विश्वास थियो ।
तर त्यसमा समस्या देखिन थाल्यो । समयमा तलब आएन, त्रिकेट संघ निलम्बनमा परेको बेला भनेर हामीले चित्त बुझयौं । जब क्यानको निलम्बन हट्यो, हामीलाई लागेको थियो अब अवस्था सहज हुँदै जाने छ । तर दुःखका साथ भन्नुपर्छ, क्यानले २०२० का लागि ढिला गरी गरेको ग्रेडिङ पनि विवादमा पर्यो । हामीले पनि आफ्नो धारणा राख्यौं, क्यान पनि छलफलका लागि तयार भयो । छलफलमा ग्रेडिङमा परेकाहरुलाई कायमै राख्दै अपग्रेड हुनुपर्नेहरुलाई अपग्रेड गर्ने, जो खेलाडीहरु ग्रेडिङमा छुटेका छन्, उनीहरुलाई समावेश गर्ने र आगामी दिनमा निश्चित मापदण्ड बनाएर समयमै सम्झौता गर्ने सहमति भएको थियो ।
तर २०२१ को ग्रेडिङ पनि पूर्वसहमति अनुसार समयमै हुन सकेन । सुरुको तीन महिना अघिल्लो वर्षकै ग्रेडिङका आधार विना सम्झौता हामीलाई तलब दिइयो । त्यसपछि पनि ग्रेडिङमा प्रगति भएन, एकै पटक अक्टोबर अन्त्यतिर खेलाडीलाई बोलाएर सम्झौता पत्रमा हस्ताक्षर गर्न भनियो । मापदण्ड कस्तो बनेको छ, किन यो ग्रेडमा परेको हो भन्ने समेत जानकारी दिइएन । मापदण्ड बनाउँदा कप्तान, उपकप्तान र सिनियर खेलाडीहरुसँग परामर्श गर्ने विगतको परम्परा पनि तोडियो । केही खेलाडीले सम्झौतामा हस्ताक्षर गरे, तर ग्रेडिङमा त्रुटि भएको थाहा भयो । म स्वयंयले कार्यबाहक सचिवलाई फोन गरेर यसबारे जानकारी गराएको थिएँ । किनकी लागेको थियो, क्यानले सम्वाद गर्ला, विगतमा झै सम्वाद र छलफलको माध्यमबाट कमीकमजोरी पहिल्याएर सच्याउने अग्रसता लेला ।
क्यानका पदाधिकारीहरुले पनि सार्वजनिक रुपमै स्वीकार गर्नुभएको थियो कि अप्रिल/मेमा मापदण्ड र ग्रेडिङ तयार भएको तर, अक्टोबरको बोर्ड बैठकमा पेश गरेर पास गरेका कारण यस्तो अवस्था आएको हो । ग्रेडिङ समयमै हुनुपथ्र्यो । जे सुकै कारणले होस्, १० महिना ढिला भइसकेको अवस्थामा राष्ट्रिय टिममा भएका, तर ग्रेडिङ छुटेकाहरुलाई पनि समावेश गरौं । ग्रेडिङमा पनि आवश्यकता अनुसार सुधार गरौं र आगामी दिनमा मापदण्ड बनाएर, त्यसअनुसार २०२२ समयमै सेन्ट्रल कन्ट्याक्ट होस् । यसका लागि क्यानले अग्रसरता लेओस् । क्यानका पदाधिकारीहरुसँग भएको सम्वादहरुमा पनि त्यही भनेका थियौं ।
तर उल्टो सम्झौतामा हस्ताक्षर नगरेको तथा ग्रेडिङमा असन्तुष्टि जनाएको विषयलाई लिएर हामीलाई स्पष्टीकरण सोध्ने काम भयो । जवाफ दिनु हाम्रो कर्तव्य थियो, त्यसैले मापदण्डमा भएको त्रुटि सच्याउनुपर्ने मतसहित जवाफ दियौं । टिममा रहेका अरु साथीहरुले पनि ग्रेडिङमा त्रुटि भएको सच्याउनुपर्ने धारणा राखेपछि हामीले क्यानको ध्यानाकर्षण गरायौं । हामीले खेलाडीहरुले पाउँदै पाएको म्याच फि नपाएको, भत्ता पहिला भन्दा कम भएको, बिमा, रिह्याब नभएको, त्रिदेशीय सिरिज जितेको प्रोत्साहन स्वरुप पुरस्कारका लागि पहल गर्नुपर्ने लगायतका विषयमा पनि हामीले लिखित रुपमै ध्यानाकर्षण गराएका हौं । त्यसपछि क्यानले छलफलमा बोलायो । काठमाडौंमा उपलब्ध खेलाडीहरुसँग भएको त्यो छलफलमा सहभागी क्यानका केही पदाधिकारी र कर्मचारीहरुले सबै खेलाडीलाई मापदण्ड र सम्झौताका साथै अरु विषयमा पनि लिखित रुपमै जानकारी गराउने भन्नु भएको थियो । तर अहिलेसम्म कुनै जनकारी लिइएको छैन ।
बरु केही दिनमै हामी चार जनालाई पहिलोको स्पष्टीकरणको जवाफ चित्त बुझ्दो नभएको भन्दै ७२ घण्टाभित्र स्पष्टीकरण दिन भनियो । हामीले दोस्रो पटक उहाँहरुलाई जवाफ दियौं । हामीलाई लागेको थियो, हामीले उठाएका विषयमा क्यानको बोर्ड बैठकमा छलफल होला, निकास खोज्ला । तर क्यानका कतिपय पदाधिकारीबाट सार्वजनिक रुपमा हामीलाई लान्छना लगाउने, कारबाही गर्नेसम्मका धम्की दिने काम भयो । तर एक्कासी कप्तान र उपकप्तान हटाउने, २०२२ मा ६ महिनासम्म सेन्ट्रल कन्ट्याक्टमा नराख्ने जस्ता कारबाही गरेको समाचारहरु आए । यसले हामीलाई निकै दुःखी बनाएको छ । के हामीले नेपाली क्रिकेटमा आजसम्म गरेको समर्पणको सम्मान यही हो ? आफ्नो हकअधिकारका लागि आवज उठाएकै आधारमा देशका बर्षै खेलेका, आफ्नो सबै इच्छा आकांक्षा मोरेर क्रिकेटमा लागेका खेलाडीहरुलाई यसरी कारबाही हुन्छ भने भोलिका दिनमा नयाँ पुस्ता कसरी आकर्षित होला ?
हामी अहिले पनि चाहन्छौं, नेपाली क्रिकेटमा देखिएका सबै समस्या हल गरौं, खेलका लागि राम्रो वातावरण बनोस् । यसका लागि नेपाल क्रिकेट संघले अभिभावकीय भूमिका खेल्दै यो निर्णयलाई पुनर्विचार गरोस् । हामी र हामी जस्ता क्रिकेट खेलमा भविश्य खोजिरहेका खेलाडीहरुले ब्याट र बल छाड्नुपर्ने दुर्भाग्यपूर्ण अवस्था नबनोस् ।
ज्ञानेन्द्र मल्ल, दीपेन्द्र सिंह ऐरी, सोमपाल कामी, कमल सिंह ऐरी
