काठमाडौं। बुधबार बिहान ११ बजेका लागि बोलाइएको प्रतिनिधिसभा बैठक अझै सुरु हुन सकेको छैन।
बैठकमा विवादमा परेका अर्थमन्त्री जनार्दन शर्माले आफ्ना कुरा राख्ने बताइएको थियो। तर, अर्थमन्त्रीलाई संसदमा बोलन नदिने एमालेले जनाएपछि अझैं बैठक सुरु हुन नसकेको हो।
सुरु हुन नसकेपछि सूचना टाँसेर बैठक दिउँसो २ बजेसम्मका लागि स्थगित गरिएको छ।
अर्थमन्त्री शर्माले आर्थिक वर्ष २०७९/८० को बजेट बनाउँदा एकजना पूर्वनायब सुब्बालाई करका दरहरू हेरफेर गर्न लगाएको आरोप लागेको छ। साथै अनधिकृत व्यक्ति प्रवेश गरेको प्रमाणका रूपमा रहेको सीसीटीभी फुटेज अर्थ मन्त्रालयका उच्च अधिकारीकै मिलेमतोमा ‘डिलिट’ गराइएको पनि उनीमाथि आरोप लागेको छ।
त्यसकारण एमालेले अर्थमन्त्री शर्माको राजीनामा माग गर्दै आएको छ।
अहिले संसदमा अर्थमन्त्रीलाई बोल्न दिने वातावरण बनाउन र नियमित झैं चलाउनका लागि मन्त्रीहरू एमाले संसदीय दलका पदाधिकारीसँग छलफल गरिरहेका छन्।
संघीय संसद्, बानेश्वरमा रहेका एक अधिकारीका अनुसार उद्योग, वाणिज्य तथा आपूर्तिमन्त्री दिलेन्द्रप्रसाद बडू र कानुन, न्याय तथा संसदीय मामिलामन्त्री गोविन्दप्रसाद शर्मा कोइरालाले एमालेका प्रमुख सचेतक विशाल भट्टराईलगायतसँग छलफल गरिरहेका छन्।
सभामुख सापकोटाले भने गृहमन्त्री बालकृष्ण खाँण, सञ्चारमन्त्री ज्ञानेन्द्रबहादुर कार्की, कांग्रेस सचेतक पुष्पा भुसाल, माओवादी प्रमुख सचेतक देवप्रसाद गुरुङसँग छलफल गरिरहेका छन्।
सम्बन्धित समचारः
अर्थमन्त्री प्रकरणः माओवादीले एमालेसँग छलफल गर्ने, संसदमा जवाफ दिँदै शर्मा
