नायक सौगात मल्ल र अनुप विक्रम शाहीले आउँदो फागुन २० गतेदेखि नेपालभर एकैसाथ प्रदर्शनमा आउन लागेको चलचित्र ‘लप्पन छप्पन २ हेर्न अपिल गरेका छन् ।
अहिले चलचित्रको प्रचारप्रसारमा लागेका उनीहरूले एक भिडियो सन्देश मार्फत लप्पन छप्पन २ हेर्न नबिर्सनुहोला भन्दै आम दर्शकहरूलाई अपिल गरेका हुन् ।
मुकुन्द भट्टको निर्देशकमा रहेको सो चलचित्रमा नेपालको वर्तमान राजनीति अवस्थाको सचित्र वर्णन गर्न खोजेको छ । चलत्रिचत्रमा दर्शकहरूले कलाकारहरू सौगात मल्ल, अनुप विक्रम शाही, शिव श्रेष्ठलगायतको भरपुर एक्सनको मज्जा पनि लिन पाउनेछन् ।
फिल्ममा शक्ति श्रेष्ठ, प्रकाश कुँवर, सरिता गिरी, एञ्जल श्रेष्ठ, अनिल खनाल, राजेन्द्र विष्ट, केरोलिन कोलिन्डा, सुपर गुरुङ, आना ढकाल, सृजना सिनालगायतका कलाकारको अभिनय देख्न पाइनेछ । चलचित्रले नेपालमा विदेशी शक्तिले कसरी सत्ता परिवर्तन गर्छन् र कालो धन कसरी आउँछ भन्ने कुरा देखाउन खोजिएको निर्माण पक्षले जनाएको छ ।
हलिउड चलचित्रमा प्रयोग गरिने लेभलको प्रविधि लप्पन छप्पन २ निर्माण गर्दा प्रयोग गरिएको जनाएको छ । कलाकार अर्पण थापाले चलचित्र आशालाग्दो बनेको दाबी गरेका छन् । यस्तै नायक शिव श्रेष्ठले चलचित्र क्षेत्रमा ४० बर्ष काम गर्दा लप्पन छप्पन २ मा उत्कृष्ट रोल पाएको भन्दै खुसी व्यक्त गरेका छन् ।
देश तथा विदेशका विभिन्न ठाउँमा ३ वर्ष लगाएर सुटिङ गरिएको चलचित्रलाई सकारात्मक प्रतिक्रिया आइरहेको निर्माण पक्षले जनाएको छ । ‘लप्पन छप्पन २’ नेपालीसँगै हिन्दी, तमिल, तेलुगु, भोजपुरी र चाइनिज गरी छ भाषामा डिजिटल प्लेटफर्ममार्फत रिलिज हुने बताइएको छ ।
खिलेन्द्रराज तिम्सिनाको प्रस्तुति रहेको फिल्मको पटकथा र संवाद निर्देशक भट्ट र सुनिल नेउरेको छ । सिनेमा निर्माणमा गोल्डेन हिल्स पिक्चर्ससँग रोयल कुँवर इन्टरटेनमेन्ट, इपी एजुकेशन अस्ट्रेलिया, उमी ग्रुप युरोप र म्याक मिडियाले सहकार्य गरेका छन् ।
सुरज अधिकारी र प्रजापति सिवाकोटीको कार्यकारी निर्माण रहेको फिल्ममा सुदीपचन्द्र बख्रेल, चिजकुमार श्रेष्ठ, प्रकाश कुँवर, निर्मल कुमार मिश्र र सन्तोषचन्द्र बख्रेल निर्माताको रूपमा छन् । मिडिया सुपरभाइजरमा ऋषब ओझा रहेका छन् ।पुरुषोत्तम प्रधानले खिचेको सिनेमालाई मिलन श्रेष्ठले सम्पादन गरेका छन् ।
